Les mots surlignés font l'objet d'une note
1Monseigneur, tout ce que je vous puys escrire est que monsieur de Suze
2est venu jusques en ce lieu acompagner monseigneur le mareschal et
3s’en retourne après disner. Monsieur de Montdragon et monsieur de
4Lers le vindrent aussi rencontrer avec une fort belle trouppe de
5gentilzhommes qui sont encor icy. Et en dernier lieu, monsieur de
6Joyeuze avec aussi une bien belle trouppe. De sorte que ce lieu en
7a bien aultant comme il en peult loger. Il semble que mondit seigneur
8le mareschal y pourra fère sejour d’une couple de jours, en atendant
9les deputés de Nymes, ausquelz il a envoyé sauf-conduict. Ilz
10luy ont envoyé une lettre plaine de passions et de bonnes parolles.
11Nous en atendons les effectz, comme nous faisons encor de ceux
12du Pouzin, Privas et Aubenas, lesquelz ne sont encor venus. Monsieur
13de Joyeuze a receu novelles de la Cour du XIIIe, comme l’on renforce
14les frontières de Picardie et de Champaigne où le regiment du sieur Du
15Ga a esté envoyé et s’y doivent acheminer des Suysses, si d’avanture
16le prince d’Orenge s’y vouloit acheminer et que ceux de Sanxerre
17avoyent faict quelque sallye et deffaict quelques gens de cheval,
18dont le roy estoyt fort indigné ; aussi qu’il se faisoyt bruict
19que le duc d’Albe devoit entrer en quelque accord avec le prince
20d’Orenge, et le nous jecter dessus, avec quelques aultres choses
21que je croys encor moings. A La Rochelle, ilz s’opiniatrent et tiennent
22Saint-Jehan-d’Angely, s’estans jectés dans La Rochelle grand nombre
23de gentilzhommes. Le jour qu’il y eust de l’emotion à Tholouze,
24il en avint de mesmes et davantage à Bordeaux. Lesdit desordres
25pourroyent bien avoir esté cause desdites elevations.
26Monseigneur, je me recommande très humblement à votre bonne grace et
27prie le Createur qu’il vous donne en parfaicte santé, très longue
28et heureuze vie. Du Sainct-Esprit, ce XXIe jour d’octobre 1572.
29Votre très humble et très affectionné
30serviteur.
31Bellievre
32La littière doit avoir passé oultre car
33elle n’est poinct en ceste ville.
34Le porteur raporte à madame la comtesse sa
35requeste appoinctée pour le regard du château et pour les
36surplus escrit à monsieur d’Entrecasteaux pour le venir
37trouver et à monsieur de Carses une bone lettre
38aux mesmes fins. Monsieur et madamoyselle d’Ourche verront icy, s’il vous plaict, mes semblables recommandations à leurs bonnes graces.